ചെന്നൈയില്‍ വന്യജീവികളുമായി വിമാനയാത്ര നടത്തിയയാള്‍ പിടിയില്‍. തായ്ലന്‍ഡിലെ ബാങ്കോക്കില്‍ നിന്ന് ചെന്നൈ അന്താരാഷ്ട്ര വിമാനത്താവളത്തിലെത്തിയ യാത്രക്കാരനില്‍ നിന്നാണ് മൃഗങ്ങളെ പിടികൂടിയത്. 22 വിദേശ വന്യജീവി ഇനങ്ങളെ ഇയാളില്‍ നിന്നും പിടികൂടിയതായി കസ്റ്റംസ് അധികൃതര്‍ അറിയിച്ചു.
ഓഗസ്റ്റ് 10 ന് ബാങ്കോക്കില്‍ നിന്ന് തായ് എയര്‍ ഏഷ്യ വിമാനത്തില്‍ ചെന്നൈയിലെത്തിയ മുഹമ്മദ് മീര സര്‍ധാരലി എന്ന യാത്രക്കാരനില്‍ നിന്നാണ് കസ്റ്റംസ് വകുപ്പിന്റെ എയര്‍ ഇന്റലിജന്‍സ് യൂണിറ്റ് മൃഗങ്ങളെ പിടികൂടിയതെന്ന് അധികൃതര്‍ പ്രസ്താവനയില്‍ പറഞ്ഞു.
ഒരു സിയാമംഗ് ഗിബ്ബണ്‍, രണ്ട് സുന്ദ ഫ്‌ലൈയിംഗ് ലെമൂര്‍, അഞ്ച് ഇന്‍ഡോ-ചേന്‍ പെട്ടി കടലാമ, ഒമ്പത് നാല് കണ്ണുകളുള്ള ആമ, ഒരു കീല്‍ഡ് പെട്ടി ആമ, ഒരു ചുവന്ന കാലുള്ള ആമ, രണ്ട് പച്ച മര പെരുമ്പാമ്പ്, ഒരു വെള്ള ചുണ്ടുള്ള പെരുമ്പാമ്പ് എന്നിവയും പിടിച്ചെടുത്തവയില്‍ ഉള്‍പ്പെടുന്നു.
1972 ലെ വന്യജീവി സംരക്ഷണ നിയമത്തിന്റെ ഷെഡ്യൂള്‍ നാലില്‍ ഈ ജീവികളെ പട്ടികപ്പെടുത്തിയിട്ടുണ്ടെന്നും അധികൃതര്‍ പറഞ്ഞു.
കസ്റ്റംസ് ആക്ടിന്റെയും വന്യജീവി (സംരക്ഷണ) നിയമത്തിന്റെയും വകുപ്പുകള്‍ പ്രകാരം സര്‍ധാരലിയെ അറസ്റ്റ് ചെയ്യുകയും ജുഡീഷ്യല്‍ കസ്റ്റഡിയില്‍ റിമാന്‍ഡ് ചെയ്യുകയും ചെയ്തു.
‘ ജീവിച്ചിരിക്കുന്ന എല്ലാ വിദേശ വന്യജീവികളെയും അവയുടെ ഉത്ഭവ സ്ഥലത്തേക്ക് തിരിച്ചെത്തിക്കുന്നതിനായി സുരക്ഷിതമായി എയര്‍ലൈന്‍സിന് കൈമാറി. കൂടുതല്‍ അന്വേഷണം പുരോഗമിക്കുകയാണ്’. വകുപ്പ് പ്രസ്താവനയില്‍ പറഞ്ഞു.
കഴിഞ്ഞ വര്‍ഷം നവംബര്‍ 6 ന് ചെന്നൈ വിമാനത്താവളത്തില്‍ നിന്ന് 36 വിദേശ മൃഗങ്ങളെ കടത്തിയതിന് ബാങ്കോക്കില്‍ നിന്ന് എത്തിയ 44 കാരനായ ഒരാളെ കസ്റ്റംസ് ഉദ്യോഗസ്ഥര്‍ അറസ്റ്റ് ചെയ്തിരുന്നു.അതുപോലെ, കഴിഞ്ഞ വര്‍ഷം സെപ്റ്റംബറില്‍ ബാങ്കോക്കില്‍ നിന്ന് പറന്ന മറ്റൊരു യാത്രക്കാരനില്‍ നിന്ന് 16 വിദേശ മൃഗങ്ങളെ പിടികൂടിയിരുന്നു.
