ലോസ് ആഞ്ജലസ്: യു.എസ് പ്രസിഡന്റ് തെരഞ്ഞെടുപ്പില്‍ റിപ്പബ്ലിക്കന്‍ പാര്‍ട്ടി സ്ഥാനാര്‍ഥിയായി മത്സരിക്കുന്ന ഡൊണാള്‍ഡ് ട്രംപിനെ കടന്നാക്രമിച്ച് വിഖ്യാത ഹോളിവുഡ് താരം റോബര്‍ട്ട് ഡി നീറോ. ട്രംപ് വെറും കോമാളിയെന്ന് റോബര്‍ട്ട് ഡി നീറോ ആരോപിച്ചു. ഗോഡ്ഫാദര്‍ -2, ഗുഡ് ഫെല്ലാസ്, ടാക്‌സി ഡ്രൈവര്‍, ഹീറ്റ് എന്നിങ്ങനെ ഹിറ്റ് സിനിമകളിലൂടെ പ്രശസ്തനായ താരത്തിന് ലോകം മുഴുവനും ആരാധകരുണ്ട്.
അമേരിക്കയെ നശിപ്പിക്കാന്‍ ട്രംപ് ആഗ്രഹിക്കുന്നുവെന്ന് റോബര്‍ട്ട് ഡി നീറോ ആരോപിച്ചു. നവംബറിലെ തെരഞ്ഞെടുപ്പില്‍ വീണ്ടും തെരഞ്ഞെടുക്കപ്പെട്ടാല്‍ ജീവന്റെ സ്വേച്ഛാധിപതി ആയി ട്രംപ് മാറുമെന്നും ഡി നീറോ പറഞ്ഞതായി ‘മിറര്‍’ ഓണ്‍ ലൈന്‍ മാധ്യമം റിപ്പോര്‍ട്ട് ചെയ്തു. അടുത്തിടെ ന്യൂയോര്‍ക്ക് സിറ്റിയില്‍ നടന്ന ഫ്രാന്‍സിസ് ഫോര്‍ഡ് കൊപ്പോളയുടെ ‘മെഗലോപോളിസ്’ സിനിമയുടെ പ്രീമിയര്‍ ഷോയുടെ വേദിയിലാണ് ഹോളിവുഡ് ഇതിഹാസം ട്രംപിനെ ‘കശക്കി’യെറിഞ്ഞത്.
‘ഡൊണാള്‍ഡ് ട്രംപ് ഈ ചിത്രം സംവിധാനം ചെയ്യുന്നതായി സങ്കല്‍പ്പിക്കൂ. മൊത്തത്തിലുള്ള ഭ്രാന്തില്‍ നിന്ന് ഇത് എവിടെയും പോകില്ല. അയാള്‍ക്ക് ഒന്നും ചെയ്യാന്‍ കഴിയില്ല. അയാള്‍ക്ക് ഒന്നിനെയും ഒരുമിച്ച് കൊണ്ടുപോകാനുമാകില്ല … രാജ്യത്തെ നശിപ്പിക്കാനാണ് അവന്‍ ആഗ്രഹിക്കുന്നത്. ഘടനയുള്ള ഒന്നും ചെയ്യാന്‍ അദ്ദേഹത്തിന് കഴിവില്ലെന്നും’ ഡിനീറോ കൂട്ടിച്ചേര്‍ത്തു.
എന്നെ സംബന്ധിച്ചിടത്തോളം, ഇത് അവസാനിച്ചിട്ടില്ല. റിപ്പബ്ലിക്കന്‍മാരെ തോല്‍പ്പിക്കാന്‍ നമ്മള്‍ പൂര്‍ണ്ണഹൃദയത്തോടെ പോകേണ്ടതുണ്ട്. അവര്‍ യഥാര്‍ത്ഥ റിപ്പബ്ലിക്കന്‍മാരല്ല, ട്രംപിനെ തോല്‍പ്പിക്കുക എന്നത് വളരെ ലളിതമാണ്. അത്തരത്തിലുള്ള ഒരു വ്യക്തി നമുക്കുണ്ടാകില്ല. എല്ലാവരും വോട്ട് ചെയ്യണമെന്നും ഡിനീറോ പറഞ്ഞു. 78 കാരനായ ട്രംപിന്റെ മുഖത്ത് അടിക്കണമെന്ന് താരം നേരത്തേ പറഞ്ഞത് വന്‍ വിവാദത്തിന് വഴി തെളിച്ചിരുന്നു.
