രാജ്യത്തെ ഏറ്റവും വലിയ കാര്‍ നിര്‍മ്മാതാക്കളായ മാരുതി സുസുക്കി ഇന്ന് തങ്ങളുടെ വാഹന ശ്രേണി അപ്ഡേറ്റ് ചെയ്യുകയും പ്രശസ്ത ഹാച്ച്ബാക്ക് കാറായ വാഗണ്‍ആറിന്റെ പുതിയ വാള്‍ട്ട്‌സ് എഡിഷന്‍ പുറത്തിറക്കുകയും ചെയ്തു. പുതിയ വാഗണ്‍ആര്‍ വാള്‍ട്സില്‍ കമ്പനി ചില കോസ്മെറ്റിക് അപ്ഡേറ്റുകള്‍ നല്‍കിയിട്ടുണ്ട്. ഇത് സാധാരണ മോഡലിനേക്കാള്‍ മികച്ചതാക്കുന്നുവെന്ന് കമ്പനി പറയുന്നു. ആകര്‍ഷകമായ രൂപവും കരുത്തുറ്റ എഞ്ചിനും സജ്ജീകരിച്ചിരിക്കുന്ന ഈ ഫാമിലി കാറിന്റെ പ്രാരംഭ എക്‌സ് ഷോറൂം വില 5.65 ലക്ഷം രൂപയാണ്.
LXi, VXi, ZXi എന്നീ മൂന്ന് വേരിയന്റുകളിലാണ് വാഗണ്‍ആര്‍ വാള്‍ട്ട്‌സ് എഡിഷന്‍ മാരുതി സുസുക്കി അവതരിപ്പിച്ചത്. പരിഷ്‌കരിച്ച ക്രോം ഫ്രണ്ട് ഗ്രില്‍, ക്രോം ഗാര്‍ണിഷോടുകൂടിയ ഫോഗ് ലാമ്പുകള്‍, വീല്‍ ആര്‍ച്ച് ക്ലാഡിംഗ്, സൈഡ് സ്‌കര്‍ട്ടുകള്‍, സൈഡ് ബോഡി മോള്‍ഡിംഗ് തുടങ്ങിയവ ഇതില്‍ ഉള്‍പ്പെടുന്നു. ഈ പുതിയ ഘടകങ്ങള്‍ കാറിന്റെ പുറംഭാഗത്തിന് കൂടുതല്‍ സ്‌പോര്‍ട്ടി ലുക്ക് നല്‍കാന്‍ സഹായിക്കുന്നു.
1.2 ലിറ്റര്‍ പെട്രോള്‍, 1.0 ലിറ്റര്‍ പെട്രോള്‍ എഞ്ചിന്‍ ഓപ്ഷനുകളോടെയാണ് കമ്പനി വാഗണ്‍ആര്‍ വാള്‍ട്ട്‌സ് എഡിഷന്‍ അവതരിപ്പിച്ചിരിക്കുന്നത്. വലിയ എഞ്ചിന്‍ 5-സ്പീഡ് മാനുവല്‍, ഓട്ടോമാറ്റിക് ട്രാന്‍സ്മിഷനുകളിലും ലഭ്യമാണ്. ഇതിനുപുറമെ, കമ്പനി ഘടിപ്പിച്ച സിഎന്‍ജി വേരിയന്റിലും ഈ കാര്‍ അവതരിപ്പിച്ചിട്ടുണ്ട്. പെട്രോള്‍ വേരിയന്റ് ലിറ്ററിന് 25.19 കിലോമീറ്ററും സിഎന്‍ജി വേരിയന്റ് കിലോഗ്രാമിന് 33.48 കിലോമീറ്ററും മൈലേജ് നല്‍കുമെന്ന് കമ്പനി അവകാശപ്പെടുന്നു.
കാറിനുള്ളിലെ ക്യാബിനിലും കമ്പനി ചില അപ്ഡേറ്റുകള്‍ നല്‍കിയിട്ടുണ്ട്. ഇതില്‍ പുതിയ ഫ്‌ലോര്‍ മാറ്റുകളും സീറ്റ് കവറുകളും ഉള്‍പ്പെടുത്തിയിട്ടുണ്ട്. ഈ കാറില്‍ ചില പുതിയ സുരക്ഷാ ഫീച്ചറുകള്‍ ചേര്‍ത്തിട്ടുണ്ട്. ഈ കാറില്‍ ഇപ്പോള്‍ ആന്റി ലോക്ക് ബ്രേക്കിംഗ് സിസ്റ്റം (എബിഎസ്), ഇലക്ട്രോണിക് ബ്രേക്ക് ഫോഴ്‌സ് ഡിസ്ട്രിബ്യൂഷന്‍ (ഇബിഡി) ഉള്ള ഇലക്ട്രോണിക് സ്റ്റെബിലിറ്റി കണ്‍ട്രോള്‍ (ഇഎസ്സി) എന്നിവ സജ്ജീകരിച്ചിരിക്കുന്നു. ഇതുകൂടാതെ, മറ്റ് സവിശേഷതകള്‍ മുമ്പത്തേതിന് സമാനമാണ്. ഡ്യുവല്‍ എയര്‍ബാഗുകള്‍, റിയര്‍ പാര്‍ക്കിംഗ് സെന്‍സര്‍, സ്പീഡ് ലിമിറ്റ് അലേര്‍ട്ട് തുടങ്ങിയവയുണ്ട്. ഇതിന് പുറമെ 6.2 ഇഞ്ച് ടച്ച് സ്‌ക്രീന്‍ ഇന്‍ഫോടെയ്ന്‍മെന്റ് സിസ്റ്റം, പുതിയ സ്പീക്കറുകള്‍, സുരക്ഷാ സംവിധാനം, റിവേഴ്സ് പാര്‍ക്കിംഗ് ക്യാമറ തുടങ്ങിയ സൗകര്യങ്ങളും ഒരുക്കിയിട്ടുണ്ട്. ഈ സവിശേഷതകള്‍ ഉള്‍പ്പെടുത്തിയ ശേഷം, അതിന്റെ ക്യാബിന്‍ അല്‍പ്പം നവീകരിച്ചതായിട്ടാണ് റിപ്പോര്‍ട്ടുകള്‍.
