സാമ്പത്തിക ഞെരുക്കത്തിനിടയിലും കോടികള്‍ പൊടിച്ചു സംസ്ഥാന സര്‍ക്കാര്‍. രണ്ടാം പിണറായി സര്‍ക്കാര്‍ പരസ്യ ഹോര്‍ഡിങുകള്‍ക്ക് മാത്രം ചെലവഴിച്ചത് കോടികളാണ്. കെ റെയില്‍ മുതല്‍ ക്ഷേമ പദ്ധതികള്‍ വരെയുള്ളവയുടെ പരസ്യം ഇക്കൂട്ടത്തിലുണ്ട്. ആറരക്കോടി രൂപയ്ക്കടുത്താണ് വിവിധ എജന്‍സികള്‍ക്കായി നല്‍കിയത്.
2021-22 സാമ്പത്തിക വര്‍ഷം ചെലവഴിച്ചത് 1,16,47,570 രൂപയാണ്. 14 ഓളം സ്വകാര്യ കമ്പനികള്‍ക്കാണ് കരാര്‍ ലഭിച്ചത്. 2022-23 ല്‍ മുഖ്യമന്ത്രിയുടെയും മന്ത്രിമാരുടെയും മുഖം പതിപ്പിച്ച ഹോര്‍ഡിങുകള്‍ക്കായി ചെലവഴിച്ചത് 1,16,98,385 രൂപയാണ്. സ്വകാര്യ എജന്‍സികളുടെ എണ്ണം 22 ആയി ഉയര്‍ന്നു. 2023-24 സാമ്പത്തിക വര്‍ഷം പരസ്യ ചെലവ് 2,56,16,598 രൂപയായി. നടപ്പ് സാമ്പത്തികവര്‍ഷത്തിലെ 7 മാസങ്ങള്‍ക്കിടെ മാത്രം പരസ്യത്തിനും പ്രചരണ പരിപാടികള്‍ക്കുമായി ചെലവഴിച്ച തുക 1,52,31,670 രൂപയാണ്
അധികാരത്തില്‍ മൂന്ന് വര്‍ഷവും 5 മാസവും പിന്നിടുമ്പോള്‍ പരസ്യം നല്‍കാന്‍ മാത്രം 6,41,94,223 രൂപയാണ് ചെലവിട്ടത്. വിവരാകാശ പ്രകാരം പുറത്തുവന്ന രേഖയിലാണ് കണക്കുകള്‍ വ്യക്തമാക്കുന്നത്. സാമ്പത്തിക ഞെരുക്കത്തിനെ തുടര്‍ന്ന് സര്‍ക്കാര്‍ ട്രഷറി നിയന്ത്രണം വരെ ഏര്‍പ്പെടുത്തുന്ന സാഹചര്യം സംസ്ഥാനത്ത് ഉടലെടുത്തിരുന്നു. ഇതിനിടയിലാണ് പരസ്യത്തിനായി സര്‍ക്കാര്‍ കോടികള്‍ പൊടിച്ചത്.
