തിരുവനന്തപുരം: തിരുവനന്തപുരത്ത് മദ്യപാനത്തെ തുടര്‍ന്നുണ്ടായ തകര്‍ക്കത്തിനിടെ യുവാവിനെ നടുറോഡില്‍ വെട്ടിപരിക്കേല്‍പ്പിച്ചു. ഓട്ടോഡ്രൈവറായ രഞ്ജിത്തിനാണ് വെട്ടേറ്റത്. തിരുവനന്തപുരം വെഞ്ഞാറമൂട് കാവറയില്‍ ചൊവ്വാഴ്ച്ചയാണ് സംഭവം. പച്ചക്കറി കച്ചവടക്കാരനായ പ്രസാദ് എന്നയാളാണ് രഞ്ജിത്തിനെ ആക്രമിച്ചതെന്നാണ് പൊലീസിന് ലഭിച്ച സൂചന.
സംഭവത്തിന്റെ സിസിടിവി ദൃശ്യങ്ങള്‍ പുറത്തുവന്നു. രഞ്ജിത്തിന്റെ കഴുത്തിലും നെഞ്ചിലും വെട്ടേറ്റത്. ഇയാള്‍ തിരുവനന്തപുരം മെഡിക്കല്‍ കോളേജ് ആശുപത്രിയില്‍ ചികിത്സയിലാണ്. അതേസമയം, പൊലീസില്‍ പരാതി ലഭിച്ചിട്ടില്ല. രണ്ടു പേര്‍ ചേര്‍ന്ന് പരസ്പരം ആക്രമിക്കുന്നതും ഇതിനിടെ ഒരു സ്ത്രീ വന്ന് തടയാന്‍ ശ്രമിക്കുന്നതുമാണ് സിസിടിവി ദൃശ്യത്തിലുള്ളത്.
അതേസമയം, തിരുവനന്തപുരത്ത് യുവാവിനെ പെട്രൊള്‍ ഒഴിച്ച് കത്തിക്കാന്‍ ശ്രമിച്ച കേസിലെ പ്രതി പിടിയിലായി. തുമ്പ സ്റ്റേഷനിലെ റൗഡി ലിസ്റ്റില്‍പ്പെട്ട പള്ളിത്തുറ പുതുവല്‍ പുരയിടം വീട്ടില്‍ ഡാനി റെച്ചന്‍സി(32)നെ ആണ് പൊലീസ് അറസ്റ്റ് ചെയ്തത്. സ്റ്റേഷന്‍കടവ് സ്വദേശിയായ ഷാജിയെ പള്ളിത്തുറ ജംഗ്ഷനില്‍ വച്ച് തിങ്കളാഴ്ച വൈകുന്നേരം 6.40 ഓടെ പെട്രോള്‍ ഒഴിച്ച് കൊലപ്പെടുത്താനാണ് ഡാനി ശ്രമിച്ചത്. സുഹൃത്തിനോടൊപ്പം പള്ളിത്തുറ ജംഗ്ഷനില്‍ നിന്ന ഷാജിയെ യാതൊരു പ്രകോപനവും ഇല്ലാതെയാണ് 32കാരന്‍ കൊലപ്പെടുത്താന്‍ ശ്രമിച്ചത്.
